अटींची पूर्तता करणार्‍या संस्थाच करू शकतील धान खरेदी
14 Oct 2023 15:23:24
गोंदिया,
conditions purchase paddy यंदाच्या खरीप हंगामालातील धान कापणी व मळणीला सुरुवात झाली आहे. असे असताना जिल्ह्यात अद्यापही शासकीय धान खरेदी केंद्रांना मंजुरी मिळाली नाही. गत काळात शासकीय धान खरेदीतील झालेला गैरप्रकार व घोटाळ्यांमुळे शासनानेही उपअभिकर्ता संस्थांवर अनेक अटी, शर्ती व नियम लादले आहेत. या नियमांची काटेकोरपणे पूर्तता करणार्‍या संस्थांनाच धान खरेदी करण्याची मंजुरी देण्यात यावी, असे पत्र महाराष्ट्र राज्य सहकारी महासंघाच्या प्रधान कार्यालयाने जारी केल्याने धान उत्पादक जिल्ह्यातील खरेदी संस्थांच्या वर्तुळात एकच खळबळ उडाली आहे.
पूर्व विदर्भातील गोंदियासह भंडारा, गडचिरोली, चंद्रपूर आणि नागपूर जिल्ह्यातील काही भागात खरीप व उन्हाळी हंगामात मोठ्या प्रमाणात धानाचे उत्पादन घेतले जाते. केंद्र शासनाच्या हमीभाव योजनेअंतर्गत धान उत्पादक जिल्ह्यात जिल्हा पणन अधिकारी कार्यालय आणि आदिवासी भागात आदिवासी विकास महामंडळ अंतर्गत उपअभिकर्ता संस्था शेतकर्‍यांकडून धानाची खरेदी करतात. धान खरेदीची प्रक्रिया संपूर्ण आभासी असली तरी मागील काळात धान खरेदी केंद्रांवर मोठ्या प्रमाणात गैरप्रकार उघडकीस आला आहे.conditions purchase paddy त्यामुळे आता शासनानेही धान खरेदी संदर्भात कठोर भूमिका घेत धान खरेदी करणार्‍या संस्थांवर काही अटी, शर्ती व नियम लादले आहेत. या नियमांची काटेकोरपणे पूर्तता करणार्‍या संस्थांनाच यापुढे शासकीय हमीभाव योजनेअंतर्गत धान खरेदी करण्याची मंजुरी देण्यात येणार आहे. यासंबंधीचे पत्रही आज जिल्हा पण अधिकारी विवेक इंगळे यांनी संबंधित संस्थांचे अध्यक्ष व्यवस्थापक यांना जारी केले आहे.