भाजपातर्फे 4 एप्रिलला स्वातंत्र्यवीर सावरकर सन्मान गौरव यात्रा

Savarkar Gaurav Yatra : सत्तेसाठी बिटीशांशी तडजोड करणार्‍या काँग्रेस नेता राहुल गांधी यांनी स्वातंत्र्यवीर वि.दा.सावरकर यांचा वारंवार अपमान चालविला आहे.यातून राहुल गांधी आणि तमाम काँग्रेसजनांचा हिंदू द्व्रेष दिसून येत आहे. काँग्रेसच्या या अपप्रचाराचे पितळ उघडे पाडण्यासाठी व स्वातंत्र्यवीर सावरकरांनी देशाच्या स्वातंत्र्यासाठी काय केले हे सांगण्यासाठी येथील भारतीय जनता पक्षातर्फे मंगळवार चार एप्रिल रोजी दुपारी 4 वाजता जुन्या शहरातील रेणुका नगर मधील बाभळेश्वर मंदिराजवळील स्वातंत्र्यवीर वि. दा. सावरकर यांच्या पुतळ्यापासून वि. दा. सावरकर सन्मान गौरव यात्रा काढण्यात येणार आहे.

 

 

 

शनिवार, 1 एप्रिल रोजी आमदार रणधीर सावरकर, आमदार वसंत खंडेलवाल आणि भाजपा महानगर अध्यक्ष विजय अग्रवाल यांनी पत्रपरिषद घेऊन ही माहिती दिली आहे. तसेच 13 एप्रिल रोजी स्थानिक क्रिकेट क्लबच्या मैदानावर ओबीसींचा पश्चिम विदर्भ महा कुंभमेळा होणार असल्याची व याला राज्याचे उपमुख्यमंत्री देवेंद्र फडणवीस, भाजपा प्रदेशाध्यक्ष आ. चंद्रशेखर बावनकुळे व पश्चिम विदर्भातील लोकप्रतिनिधी उपस्थित राहणार असल्याची माहिती या प्रसंगी देण्यात आली आहे. 11 एप्रिल ते 14 एप्रिलपर्यंत समता सप्ताह भाजपातर्फे साजरा केला जाणार आहे. तसेच 6 एप्रिल हा भाजपाचा स्थापना दिवस साजरा केला जाणार आहे. राज्यातील भाजपा शिवसेना सरकारने जिल्ह्यातील रूपनाथ महाराज संस्था दहिहंडा व पळसोबढे येथील देवस्थानाला 26 कोटी रुपयांचा निधी उपलब्ध करून दिला आहे, अशी माहिती भाजपा प्रदेश सरचिटणीस आ. रणधीर सावरकर यांनी या पत्रपरिषदेमध्ये दिली.

 

  

स्थानिक सर्किट हाऊस येथे भाजपातर्फे गौरव सन्मान यात्रा संदर्भाची माहिती देण्यासाठी पत्रपरिषद आयोजिण्यात आली होती.त्यात आमदार गोवर्धन शर्मा, आमदार हरीश पिंपळे आमदार वसंत खंडेलवाल, महानगर अध्यक्ष विजय अग्रवाल, अनुप धोत्रे, तेजराव थोरात, गिरीश जोशी, माधव मानकर, संजय गोडफोडे, जयंत मसने, संजय जिरापुरे, अक्षय जोशी, संजय झाडोकार, डॉ. अमित कावरे, संजय जोशी आदी उपस्थित होते. ही यात्रा डाबकी रोड कस्तुरबा गांधी मार्ग, विठ्ठल मंदिर चौक , जयहिंद चौक, शहर कोतवाली, बस स्टँड रोड, अग्रसेन महाराज चौक, दुर्गा चौक, गणेश स्वीट मार्ट राऊतवाडी, बारा ज्योतिर्लिंग मंदिर, जवाहर नगर चौक, सिविल लाईन चौक, नेहरू पार्क, अशोक वाटिका चौक, नवीन बस स्टॅन्ड चौक ते बाबासाहेब आंबेडकर खुले नाट्यगृह अशी निघणार आहे.

 

 

याप्रसंगी स्वातंत्र्यवीर सावरकरांच्या साहित्याचे अभ्यासक व सुप्रसिद्ध वक्तेप्रा. सतीश फडके यांचे सावरकर यांच्या जीवन चरित्रावर व्याख्यानाचे आयोजिन करण्यात आले आहे. या कार्यक्रमात सर्व राष्ट्रप्रेमी नागरिकांनी मोठ्या संख्येने उपस्थित राहावे, असे आवाहन आ. सावरकर, आ. वसंत खंडेलवाल व विजय अग्रवाल यांनी यावेळी केले. प्रास्ताविक विजय अग्रवाल यांनी केले. यावेळी 6 एप्रिल रोजी भारतीय जनता पक्षाचा स्थापना दिवस मोठ्या प्रमाणात साजरा करण्यात येणार असल्याची माहिती देण्यात आली. तसेच 11 एप्रिल रोजी महात्मा ज्योतिबा फुले यांची जयंती 14 एप्रिल भारतरत्न डॉ. बाबासाहेब आंबेडकर यांची जयंती भारतीय जनता पक्षाचे विविध आघाड्या साजरी करणार आहे.