संघर्षमय प्रवासातून यशाकडे

darshan kumar इंडस्ट्रीत जवळजवळ १५ वर्षांचा प्रवास पार केलेले अभिनेता दर्शन कुमार आज यशाच्या शिखरावर आहेत. छोट्या पडद्यावरून आपल्या अभिनय कारकिर्दीची सुरुवात करणाऱ्या दर्शनने आज ओटीटी विश्वातही आपली वेगळी ओळख निर्माण केली आहे. 'आश्रम' मालिकेतील उजागर सिंग आणि 'द फॅमिली मॅन' मधील मेजर समीर ही त्याची पात्रं प्रेक्षकांच्या मनात घर करून गेली आहेत. 'काश्मीर फाइल्स'नंतर 'दिल्ली फाइल्स'मुळेही तो प्रकाशझोतात आला आहे.

 

 

 

दर्शनने आपल्या संघर्षमय प्रवासाबद्दल सांगितले. तो म्हणाला, "लंडनमध्ये 'फॅमिली मॅन ३' चे शूटिंग सुरू असताना, एका हॉटेलमध्ये मला बिल भरण्यापासून थांबवले गेले. 'उजागर सिंगकडून पैसे घेऊ शकत नाही,' असे मॅनेजरने म्हटले. इतकेच नाही तर त्यांनी माझ्यासाठी खास बदाम व पीठ न वापरता केक बनवला होता. लंडनमध्ये अनेक ठिकाणी लोकांनी मला प्रेमाने बिल देण्यापासून रोखले आणि फक्त माझ्यासोबत फोटो काढण्याची इच्छा व्यक्त केली."

 

आपल्या darshan kumar संघर्षाच्या काळाबद्दल तो पुढे म्हणाला, "मी मुंबईत सात मित्रांसोबत एका खोलीत राहत होतो. स्वयंपाकासाठी फक्त खिचडी बनवायचो. प्रवासासाठी पैसे नसल्याने पायी चालत जायचो. पाच रुपयांच्या बिस्किटावर दिवस काढले आहेत. दररोज ऑडिशनसाठी स्टुडिओचे दरवाजे ठोठावायचो. मित्रांकडून कपडे उधार घेऊन ऑडिशनला जात होतो. कित्येकदा ऑडिशनची संधीही मिळाली नाही."

 

दर्शनने एका मोठ्या नकाराचाही उल्लेख केला. "एका दिग्गज दिग्दर्शकाच्या चित्रपटासाठी मला नसीरुद्दीन शाह यांच्या शिफारशीनंतर निवडले गेले होते. मी वर्षभर त्या भूमिकेसाठी तयारी केली. मात्र, एका फोनवर मला सांगण्यात आले की, 'आम्ही नवीन कलाकारावर एवढा मोठा जुगार लावू शकत नाही.' माझे एक वर्ष वाया गेले आणि त्यासाठी एक रुपयाही मिळाला नाही," असे तो म्हणाला.आज भारतात आणि परदेशातही प्रेक्षकांकडून भरभरून प्रेम मिळत असले तरी, संघर्षाच्या त्या दिवसांची आठवण दर्शन कुमारला कायम जिवंत ठेवते.