‘स्वरसंध्या’ कार्यक्रमात रसिक भावुक

Khamgaon music event स्वरसम्राज्ञी, पद्मविभूषण, महाराष्ट्र भूषण स्वर्गीय आशाताई भोसले यांच्या स्मृतीला अभिवादन करण्यासाठी खामगाव येथे आयोजित करण्यात आलेल्या ‘स्वरसंध्या’ या विशेष संगीत कार्यक्रमात रसिकांनी भावनांचा ओघ अनुभवला. बुधवारी, २२ एप्रिल रोजी स्थानिक कोल्हटकर स्मारक भव्य सभागृहात पार पडलेल्या या कार्यक्रमात प्रचंड टाळ्यांचा कडकडाट, शिट्ट्यांचा गजर आणि अनेकांच्या डोळ्यांत दाटून आलेले अश्रू अशा मिश्र भावनांचे दृश्य पाहायला मिळाले.

 

 

गेल्या सात दशकांहून अधिक काळ मराठी, हिंदी, नाट्यसंगीत, भावगीते, गझल आणि बालगीतांच्या माध्यमातून रसिकांच्या मनावर अधिराज्य गाजविणाऱ्या आशाताई भोसले यांच्या अजरामर गायनकलेला या कार्यक्रमातून अनोखी श्रद्धांजली अर्पण करण्यात आली. त्यांच्या स्मृतींना उजाळा देताना रसिकांनी त्यांच्या गीतांचा अनुभव पुन्हा नव्याने घेतला आणि प्रत्येक सादरीकरणाला उत्स्फूर्त दाद दिली.

संस्कार भारती बुलढाणा जिल्हा, विदर्भ साहित्य संघ शाखा खामगाव आणि टिळक स्मारक महिला मंडळ खामगाव यांच्या संयुक्त विद्यमाने या कार्यक्रमाचे आयोजन करण्यात आले होते. कोणत्याही राजकीय अथवा सामाजिक गाजावाजाविना अत्यंत साध्या आणि सुसंस्कृत पद्धतीने कार्यक्रमाची सुरुवात स्व. आशाताई भोसले यांच्या प्रतिमेच्या पूजनाने झाली. त्यानंतर त्यांच्या अजरामर गीतांच्या सादरीकरणातून संपूर्ण सभागृहात भावपूर्ण वातावरण निर्माण झाले.या कार्यक्रमात डॉ. प्राजक्ता हसबनीस, ऋतुजा मुळे, अनुपमा भडंग, श्रद्धा कुळकर्णी आणि वैष्णवी सोले यांनी आपल्या सुमधुर गायनातून आशाताईंच्या गीतांना स्वरांजली अर्पण केली. प्रत्येक सादरीकरणानंतर सभागृहात टाळ्यांचा कडकडाट होत होता, तर काही क्षणांतच भावनांचा उद्रेक होऊन रसिकांच्या डोळ्यांत पाणी तरळत होते.

कार्यक्रमाचे निवेदन सौ. विद्या कावडकर आणि शेखर कुळकर्णी यांनी प्रभावीपणे सादर केले. तबल्यावर विजय दहीभात यांनी लयबद्ध साथ दिली, तर संवादिनीवर डॉ. प्रवीण आळशी यांनी दिलेल्या सुरेल संगतीने संपूर्ण कार्यक्रमाची शोभा वाढवली.खामगाव शहरातील मोठ्या संख्येने उपस्थित असलेल्या रसिकांनी या ‘स्वरसंध्या’तून आशाताई भोसले यांच्या संगीतसृष्टीतील अमूल्य योगदानाला आदरांजली वाहिली. त्यांच्या गाण्यांनी उपस्थितांना केवळ मंत्रमुग्धच केले नाही, तर त्यांच्या आठवणींमध्येही भावनिक प्रवास घडवून आणला.